Elchi

Odatda davlat boshliqlari boshqa bir davlatga tashrif buyurishidan avval ularning elchilari boradi. Elchilar mezbon davlat vakillariga davlat rahbarining qachon kelishi, tashrifining maqsadi, muhokama qilinadigan masalalarni maʼlum qiladi. Elchilarga qilingan muomalaga koʻra davlat boshliqlarining muomalasiga baho beriladi. Yaʼni elchilarning ikrom qilinishi davlat rahbariga izzat-ikrom koʻrsatish bilan barobar, aksincha, elchiga nisbatan beparvolik, behurmat munosabatda boʻlish davlatga nisbatan hurmatsizlik hisoblanadi. Elchining oʻldirilishi oʻsha davlatga urush eʼlon qilganlikning belgisi ekanligi ham hammaga maʼlum...

Oylarning sultoni Ramazonning mehmon boʻlib kelishiga sanoqli kunlar qoldi. Uning elchisi shaʼbon esa bizni oz fursatda tark etadi. Ramazonning elchisini qanday qarshi oldik?! Unga oʻzi munosib boʻlgan hurmatni koʻrsata oldikmi, ehtirom bilan kuzatishga tayyormizmi?! Hali ham fursat bor. Ramazon tadorigiga imkon bor!

Alloh taolo barchamizni Ramazonga sogʻ-salomat, iymon butunlikda, eʼtiqod musaffoligida, yuzimizni yorugʻ qilib yetkazsin va uni chiroyli oʻtkazib, yutuqlar bilan chiqishimizga muvaffaq qilsin!

«Ramazon sogʻinchi»  kitobidan